إوعى تخاف

السبت، 23 أغسطس 2008

أمن الدولة يمنع عرس نجل د / جمال حشمت وشبرا ثكنة عسكرية ؟؟!!!!!!

تحديث هام
========
اقراه فى الاخر

اليوم وفى مسجد الاتوبيس بدمنهوركان لنا موعد مع بلطجة امن الدولة
حيث كان سيعقد عقد قران نجل الدكتور محمد جمال حشمت القيادى الاخوانى بالبحيرة
ولكن تحولت شبرا الى ثكنة عسكرية وتم غلق جميع الطرق المؤدية للمسجد
الذى سيعقد به عقد القران وتفتيش كل المارة وغلق المسجد
وكتابه عليه لافته المسجد مغلق للتنضيف
هذا وقد حضر الى دمنهور فضيلة الاستاذ الدكتور محمد السيد حبيب

نائب المرشد العام للاخوان المسلمين والدكتور عبد المنعم أبو الفتوح
والدكتور أسامة نصر عضوا مكتب الإرشاد
والدكتور إبراهيم الزعفراني عضو مجلس شورى الجماعة
أعضاء الكتلة البرلمانية للإخوان المسلمين بمصر
وقيادات ورموز الإخوان بمحافظة البحيرة
والعديد من رموز القوى السياسية

ولكن بفضل الله تمكن بعض الاخوة من فتح الباب الخلفى للمسجد

والسماح للاخوة بالدخول وللضيوف ولكن كان هناك عدد قليل من الحضور
بعد تفريق الامن لجموع المحشدين لتهنئة الدكتور محمد جمال حشمت
ودى حكاية اخ ومغامرة وصوله للمسجد ارويها لكم
طب احكيلى كده دخلت ازاى حبيبى احكيلى انت دخلت المسجد ازاى
مفيش كنت جاي من ناحية شرطة النصر
(شرطة النصر) دى حته بينها وبين المسجد زى كيلو كده
اصل التاكسي قالي حنزلك عند شرطة النصر ممنوع نقربوا من مسجد الاتوبيس
وبعدين السكة كانت مقفولة بالامن وبعدين نداني ظابط شرطة
قالي انت رايح فين قولتلو انا رايح محلي في شارع 20
فقالى لف من ناحية التانيا
وبعدين نداني المخبر بتاع امن الدولة الاسمر ده عارفه
وقالي مترحش كتب الكتاب وروح علي طول
قولتله ماشي وبعدين لفيت
وعملت نفسي عبيط وسالت ظابط انا عايز اروح شارع 20
والسكة مقفولة متعرفش اروح منين
راح معديني من وراء المسجد
ولقيت م/ اسامة سليمان احد قيادات الاخوان بالبحيرة
واقف هو و م/ حسني عمر مرشح الاخوان فى انتخابات الشورى الماضيه
بيدخلو الناس من مدخل باب صغير خالص اللي بيطلع علي المناسبات
بس دخلت صليت العصر وحضرت العقد وكان العدد قليل جدا
===========================
وفى النهاية نقول لامن الدولة ورجالها
حسبنا الله ونعم الوكيل فيكم اضعتم فرحتنا
وللاسف انا مش لاقى حد معاه اى صور
لو لقيت انا هنزلها لكم على طول

انا متأسف جدا اخوانى زوار مدونتى الكرام
على موضوع الصور فلم اتمكن من الوصول
الى اى صور او حتى عن طريق اى حد صور فى الشارع
لانه زى ماحكيت انها كانت ثكنه عسكرية
فانا متأيف جدا وكنت اتمنى ان اتى لكم بصور

ده مقال للدكتور جمال حشمت ردا على ماحدث فى عقدالقران

مع خالص تحياتى

أخــــــوكــــــم

الـنــجـــــم الـقــــــــــادم

السبت، 16 أغسطس 2008

أنــــا نـجـحــت

السلام عليكم

أنــــا نـجـحــت

الحمد لله انا جبتها من الكنترول

بس النتيجه لسه مطلعتش

بس حسبى الله ونعم الوكيل

النتايج زفت جدا جدا جدا

حسبنا الله ونعم الوكيل فى الدكاترة والعمدا

والجامعه والتعليم فى مصر كله

يلا الحمد لله

أنــــى نـجـحــت

اخوكم

النجم القادم

الأربعاء، 6 أغسطس 2008

فن التخطيط في مصر

حقا ماحدث أول أمس من الشركة المصرية لنقل البيانات (تى داتا)
من فصل لخدمة الانترنت على مستوى الجمهورية
والقيام بعمل اعدادا للمودم او الروتر
وفقا للسستم الجديد التابع للشركة
حيث قامت الشركة فى حوالى الساعة الحادية عشر صباحا
بفصل الخدمة عن جميع المشتركين اللذين لم يقوموا بعمل اعدادات للمودم او الروتر الخاص بهم دون توجيه انذار مسبق للعميل او حتى للوكلاء لهم فى المحافظات يعد تخطيطا جيدا من كبرى شركات adsl فى مصر وهى الشركة المساهمة المصرية فى نفس الوقت هذا مايطرح تسؤال عن فن التخطيط فى مصر وماحدث هذا يؤكد بل يوثق اننا لسنا على درايه باى شئ حتى لما نيجى نطبق حاجه زى بالظبط موضوع قانون المرور كده لما يقولوا شنطه اسعافات اوليه توضع فى العربية طب على راى السواقين طب منشتغلوا دكاترة احسن بقى يافرحتى نحط شنطه اسعافات اوليه وانا معرفش استخدم اى حاجه منها فماحدث اليوم من الشركة المصرية اثار حفيظة الكثير من مستخدمى الانترنت فى مصر حيث توقفت الاشغال والسيبرات والنت طوال اليوم حتى تم عمل اعداد المودم او الروتر وفقا للسستم الجديد فحقا لا تتعجب اننا فى مصر
وايضا ماهو السر فى تطبيق هذا السستم بجعل كل عميل له usernamer ,password خاصين به هذا يطرح الكثير من علامات الاستفهام حول ذلك هل هذا يسمح بالتدخل الامنيه فى الانترنت ومراقبة العملاء ومعرفه الريال ايبى بتاع كل عميل ام ماذا ؟ بجد سؤال بلا اجابة واللى عنده اجابه يخليها لنفسه علشان ميتقفش من قفاه هههههههههه
منورين والله المدونة وحشنى كتير

عاوزين منى حاجه
السلام عليكم

اخوكم
النجم القادم

الأحد، 27 يوليو 2008

أجازة من كل شئ

السلام عليكم ورحمة الله وبركاته
أيوة بجد أنا وأخد أجازة من كل حاجة
فأنا الآن في الأتوبيس ذاهب لرحلة لمدة أسبوع
وأخدت أجازة من الشغل اي نعم صاحب الشغل رفض
وياعالم هيحصل أيه لما أرجع بس أنا أخدت أجازة حتي أستجم
وأعود من جديد النجم القادم علي حق
ففي هذه الفترة معلش هكون مقصر شوية في حق المدونة وفي حقكم
لأني هكون في البحر ومافيش نت في المكان فانا داخل نت من علي الموبايل
اي نعم هو ببلاش بس ممل جدآ هحكي لكم عن حكاية ببلاش
وأزاي لما أرجع بإذن الله فلذلك التمسوا لي العذر ودعواتك
أخوكم
النجم القادم

الأحد، 20 يوليو 2008

امرأة بالف راجل

يحكى زوج بعد نجاتة من غرق الباخرة قصة زوجتة ويقول

صرخ الجميع ان الباخرة تغرق وصرخت فيها هيا اخرجى فقالت لى لن اخرج حتى البس حجابى كامل فقولت لها هذا وقت حجاب اخرجى فاننا سنهلك فقالت والله لن اخرج حتى البس حجابى كامل فن موت اموت وانا فى طاعة الله فلبست وخرجت مع زوجهاوحتى ادرك الجميع انهم يغرقون قالت لزوجها استحلفك انت راضى عنى فبكى الزوج
فقالت اريد ان اسمعها منك فقال والله انى راضى عنك
فبكت المراة فقالت اشهد ان لا اله الا الله وان محمد رسول الله وظلت ترددها
حتى غرقت
فبكى الزوج وقال ارجو من الله ان يجمعنى بها فى الاخرة فى جنات النعيم
يا سبحان الله تغرق وهى محافظة على طاعة الله غير الكثير من النساء
التى اصبح عندهم الحجاب عادة وليس عبادة

نقلا عن احد المنتديات

أخــوكـــــــــم

الـنـجـــــم الـقــــــادم

الأحد، 13 يوليو 2008

بودى مات يا أحمد

السلام عليكم ورحمة الله وبركاته

البقاء لله وحده

*********

تحديث هام

********

ياجماعة الدعاء فاهله لايحتاجون الا الدعاء انا لسه جى من عندهم

والده فى حالة لايرثى عليها والدته فى عالم تانى بجد ربنا يصبرهم

ابوه عنده هستريا وامه قعدت اتكلمت معاها قاتلى ربنا مايكتبها على حد

يا احمد الموته وحشه اوى لما تشوفه غرقان فى دمه قدامك

وحكتلى انه كان حاسس وكل شويه يقولها انا عاوز اعمل اللى نفسى فيه

كان يفعل قبل موت بثلاثة ايام كل الاشياء التى يحبها

بجد ربنا يصبرك يا ابوه وانتى يا والدته ربنا مايكتبها على حد

==========================

بودى مات يا أحمد

ده الرد اللى سمعته من سارة

عندما علمت بخبر وجود حالة وفاة عند أحد أصدقائنا

حيث أننى مررت على أحد محلاتهم فوجدته مغلقاً

وعليه ورقة المحل مغلق لوفاة نجل صاحب المحل

أخذتنى الدهشة وأخرجت الموبايل من جيبى وإتصلت

الوووأيوة سارة خير فيه أيه ومكان الا رد واحد

بودى مات يا أحمد

أنا وقفت مكانى مندهشاً بودى مين فردت بودى أخويا وإنفتحت فى العياط

طب ازاى قوليلى قالتلى كنا عند تيته فى إسكندرية زى مابنروح كل جمعة

وبعدين قلنا نروح على البحر وبنعدى جرى بودى وقامت عربيه ضرباه

ومات فى الحال أنا فى هذا الوقت لم أتملك نفسى وبدات الدموع

تنهمر من عينى طب إنتوا عاوزين أى حاجه وقفلت وأنا لا أتمالك نفسى

فكان بودى إبن العشر سنين فكان فى المرحلة الابتدائية

هو ومحمد اخوه تقريبا توأم فكانت البسمة لاتفارقه دائما

فكنت كلما زهبت اليهم يقعد يهزر معايا ويقابلنى

عمو أحمد جه عمو أحمد جه وكنت أفرح جداً بيه

ولما أروح ومالقهوش أسأل عليه الحاجه أُمال بودى ومحمد فين

تقولى فى الشارع انت عارف بيبطلوا يا الكمبيوتر يا الشارع

ولما كان الكمبيوتر يحصل فيه حاجه يقولى تعالى شوف الكمبيوتر البايظ ده

ولما أروح يقعد يناكب فيا ويهزر معايا هو ومحمد أخوه

وآخر مره كنت عندهم فى المحل كان بياكل كشرى وقعت أهزر أنا وهو

وكنت بركبلهم كاسيت للمحل قعد يهزر معايا ويقلعلى الحاجه اللى بركبها

افتكر أيه ولا أيه كفايه الإبتسامه الحلوة اللى ماكنتش بتفارق وجهه

كفاية مش قادر بجد أكتب حاجه مش قادر أعصابى خلاص

حقاً الموت يأتى بغته مافيش كبير ولا صغير

البوست الماضى الدكتور المسيرى والبوست هذا بودى ابن العاشرة من عمره

جماعة مش طالب منك حاجه الا أن تدعوه له بالفردوس الأعلى مع الأبرار

وأن تدعوا لأمه وأبوه وأخواته ولنا جميعا بالصبر والسلوان

ربنا يصبرنا على فراقك يا بودى

أخـــــــوكــــــــم

الـنـجـــــــــم الـقــــــــــــــادم

الاثنين، 7 يوليو 2008

بالصور دمنهور تشيع جثمان الدكتور المسيرى

في مشهد مهيب وبمشاعر يلفها الحزن والأسى

شيع من مسجد التوبة عصر يوم الخميس الماضى

جنازة العالم المفكرالاسلامى الدكتور عبد الوهاب المسيري

بعد أن وافته المنية فجر يوم الخميس بمستشفى فلسطين

عن عمر يناهز السبعين عاما بعد صراع مرير مع المرض.
وشارك في تشييع الجنازة اسرة الفقيد والاستاذ محمد سويدان

مسئول المكتب الادارى للاخوان بالبحيرة والفنان عبد العزيز مخيون

ود .محمد جمال حشمت وم.ابو العلا ماضي ود.يحي القزاز

والشاعر عبد الرحمن يوسف والنائب حسين ابراهيم

نائب رئيس كتلة الاخوان بمجلس الشعب والنواب د.حمدي حسن

ود.عبد الحميد زغلول وعبد الوهاب الديب ود.مجدي قرقر

ود.عبد الجليل مصطفي القائم باعمال حركة كفاية

ود.عادل العطار امين كفاية بالبحيرة وحشد غفير من قيادات الاخوان

والعمل الوطنى بالمحافظة وفى غياب رسمى وحكومى

والآن اترككم مع صور الجنازة بدمنهور سائلين المولى عزوجل

ان يتغمد الفقيد بالرحمة ويلهم اهله الصبر والسلوان

الدكتور محمد جمال حشمت

م/على عبدالفتاح

اهالى البحيرة فى انتظار وصول الجثمان

م/على عبدالفتاح و م/محسن القويعى احدقيادات بالمحافظة

د.مجدى قرقر

الفنان عبدالعزيز مخيون فى انتظار وصول الجثمان

الدكتور عادل العطار امين كفاية بالبحيرة

لحظة وصول اهل الدكتور المسيرى من القاهرة

لحظة وصول جثمان الدكتور عبدالوهاب

الدكتور عبدالوهاب عند وضعه فى النعشصلاة الجنازة على الدكتور عبدالوهاب المسيرى

اعداد غفيرة من المصلين

لحظة خروج الجثمان من مسجد التوبة الاهالى يتزاحمون على حمل النعش
جانب من الاعداد الغفيرة المشاركة فى الجنازة

الدكتور حمدى حسن يشارك فى الجنازة

فى الطريق للمقابر