محليات البحيرة 2008 ... قنابل مسيلة للدموع ... ورصاص مطاطى

السلام عليكم ورحمة الله وبركاته

معلش أنا أسف المفروض التدوينة دى كانت تنزل الظهر
ولكن أخوكم كان عامل دماغ كيميائى هتعرفوه بعدين
ولكن يلا بينا نحكى الاول على يومنا الطويل اللى بدأ من مرواحى
الكلية وكنت عارف إن عندنا مؤتمر لإحياء ذكرى الشيخ أحمد ياسين
والدكتور عبدالعزيز الرنتيسى وفضح انتهاكات المحليات 2008
تمام رحت الكلية والحمد لله كله تمام بدأنا ندعو الطلبة للمؤتمر
وتم المؤتمر بحمد الله وكانت مشاركة متميزة من الطلاب
ونشكر كل الاخوة والاخوات اللى شاركوا فى المؤتمر
وبعد إنتهاء المؤتمر وجدت أخ يبلغنا بوجود وقفة لمرشحى الإخوان المسلمين
بالمحليات أمام محكمة دمنهورالابتدائية فتوجهنا جميعا نحن طلاب الاخوان
الي مكان الوقفة ولكن وجدنا أفواج هائلة من الامن المركزى وامن الدولة
والشرطة بالزى المدنى اللذين انتشروا فى كل الطرق المؤدية الى المحكمة
ولكن بحمد الله تمكنت من الوصول الى مكان الوقفة فوجدت بسم الله
ماشاء الله أكثر من 5 الاف من الاخوان المسلمين بالبحيرة
متواجدون فى مكان الوقفة وكانت وقفه أكثر من رائعة حيث
الهتافات تخرج صادقة من القلب لتعلن للناس أجمعين أن
دولة الظلم ساعة ودولة الحق قائمة الى أن تقوم الساعة
بدأت الوقفة ببعض من الهتافات المطالبة بقبول أوراق
المرشحين وتنفيذ احكام القضاء الإدارى واجبة النفاذ
وطلع الاستاذ محمد سويدان مسئول الاخوان المسلمين بالبحيرة
لكى يلقى كلمته ولكن يقال إن بعض قيادات أمن الدولة طالبت الأستاذ محمد
بعدم الوقوف وطالبوه باصراف الناس بالادب بدل من ماهيتصرفواهم
على حد تعبيرهم ولكن الأستاذ محمد أخبرهم أنهم واقفين لمدة دقائق قليلة
ولكنهم رفضوا ولكن الأستاذ محمد آبى أن ياتى كل هؤلاء الاخوان
لكى يطالبوا بحقهم ويمنعهم الأمن فتحدث الأستاذ محمد الى جموع الاخوان
وبدأ بشكر كل الاخوان اللى أتوا من مختلف القرى لكى يقفوا وقفة حق
فى وجه الظالم ولكن الامن آبى ذلك فإذا بجنود الامن المركزى ينزلون
من عربياتهم ويبدأون فى عمل حركاتهم المبدائية كانوا بيسخون على أساس
أن عندهم ماتش وبدأوا يصدرون أصواتاً غريبة وحمحمات ولكن الأستاذ محمد
ردد بعض الهتافات وقالها عالية لن ترهبونا ولن تردونا عما نطالب به وبدأ فى
رصد الانتهاكات التى كان يود أن يكملها وهى منذ بداية تقديم أوراق الترشيح
الى عدم إدارج الاسماء وعدم تنفيذ أحكام القضاء الادارى واجبة النفاذ
ولكن كان لقيادات أمن الدولة رأى اخر فإذا بجنود الامن المركزى يبدأون
فى إطلاق القنابل المسيلة للدموع لتفريق جموع المشاركين وإذا بالرصاص
المطاطى يدوى فى سمائكى يادمنهوروالقنابل المسيلة للدموع تخنق دمنهور
لتؤدى الى إصابة أكثر من 100 فرد بحالات إغماء وإختناق مما أدى الى
حدوث إصابات بالغة الخطورة فى بعض المشاركين وبدأ الناس يتراجعون
الى الخلف خوفاً من القنابل المسيلة للدموع والغازات بتاعتها
والرصاص المطاطى وما أدراك ما الرصاص المطاطى
ولكن الحمد لله أخوكم النجم القادم سقطت بجواره قنبلة مسيلة للدموع
ومعرفتش أيه اللى حصل فاجأة لقيت نفسى بين أيدى بعض الاخوة
ولكن الحمد لله كان معايا أخ من إخوان الجامعة فى الحال جاب مية
وقام دالقها على رأسى فالحمد لله فوقت كتير وبدأنا نتراجع للخلف
لان الأمن بدأ يتوغل فى جموع المشاركين وبدا يعتقل كلا من يقابله
جدير بالذكر أن أمن الدولة اعتقلت فى بداية الوقفة الأخ المصور
حيث التف حوله أكثر من 10 مخبرين وقاموا خاطفينه وخاطفين
الكاميرا الفديو من أيديه وإقتادوه الى عربية أمن مركزى مما
يوحى أنهم كانوا ناوينها من الأول ولكن الحمد لله الأخوة تداركوا
الموقف وتجمعنا من تانى فى الشارع المقابل لمسجد سيدى عمر
وبدا الإخوان فى ترديد الهتافات والدعاء على الظلمة ولكن فى هذه
الاثناء كانت قيادات ومخبرى أمن الدولة عمالة تعتقل فى كل الأخوة
اللى تقابلهم وختم الأخوة وبدأ فى الإنصراف ولكن أمن الدولة آبت
أن تضربنا وتضرب علينا رصاص مطاطى و قنابل مسيلة للدموع
وكمان نروح بيوتنا فقاموا بعمل تمشيط للمنطقة وقاموا باعتقال
نحو 150 من الإخوان وجارى رصد الباقى وفيه ناس كتير
من القرى مرجعوش بيوتهم حتى كتابة البوست ده

ده ياجماعة فديو المظاهرة وفى نهايته الضرب صوت وصورة نقلاً عن موقع إخوان البحيرة

ولكن الأسود من كده بل الأنيل والأزبل والاحقر (قول زى ما أنته عاوز)
من شوية حسالة الأمن بالزى المدنى يعتدى على مجموعة من الأخوات فى

طريق عودتهم لمنازلهم بالضرب والسب وكانوا عاوزين يعتقلوهم ماهى

دى اللى كانت ناقصه علشان كانت الدنيا تقوم عليهم الله يخربيت ابوهم .
أنا دلوقتى كويس دماغى بس كانت تعبانى شويه ولكن الحمد لله
بس مش هقولكم الدماغ الكيميائى دى كانت جامده طحن
أول مرة أشوف حد بيعمل دماغ بالغازات والقنابل هو ده التميز.
فى النهاية لى تساؤل بسيط ليه بيحصل كل ده منعونا من الترشيح
ومنعونا من التظاهر السلمى فاضل أيه تانى؟
بس أنا بقول للظلمة وأعوان الظلمة أحنا مش هنخاف
وانا بقولها بأعلى صوتى (إوعى تخاف)
وأحنا مش هنتراجع عن الطريق اللى سلكناه من أجل الدفاع
عن حقنا والدفاع عن عرضنا وأرضنا وحسبنا الله ونعم الوكيل

﴿وَاللَّهُ غَالِبٌ عَلَى أَمْرِهِ وَلَكِنَّ أَكْثَرَ النَّاسِ لا يَعْلَمُونَ﴾

نقلها لكم من داخل أرض المعركة أخوكم

الـنـجــــم القـــادم