الأربعاء، 25 مارس 2009

ألو ...يا شعب


ترن ....ترن ....ترن ... ألو ....ألو ....ألو ...أيوه يافندم .... عايز مين .....

عايز الشعب .... أنت حضرتك طالب رقم كام ...

أنا طالب 7 أصفار

إحنا السنترال طلباتك إيه ....

عايز أكلم الشعب .....النمره بضربها ما بتردش هو الخط بتاعهم فيه حاجه ....؟؟؟

نمرتهم سليمه زي ماهيه 7 اصفار

طيب ليه مابيردش ...؟؟؟

أنت ما ينفعش تكلمه طوالي لازم إحنا نحولك علشان هو ما بنكشفش علي غرب ...!!

طيب حولني

بس خلي بالك هو بيتكلم بصعوبه ....!!
مش مهم ...عايز اسمع صوته
...واحشني ...نفسي أطمئن إنه عايش ....هو عامل إيه دلوقتي ...؟؟؟

والله حالته مش ولابد ...من بعد ما عطوله دوا غلط ...والبنج كمان كان زياده ودخل في غيبوبه إضطراريه ...عموماً هو بيعافر ولكن أنت أدري بعلاج اليومين دول بيجيب الأرض ...!!!

يعني الحاله صعبه قوي كده ... مش ممكن أسمع همسه حتي منه ...!!

والله أنت صعبت عليا ولازم أقول لك الحقيقه ....
خير .....

البعده حاطينه في عزل ومانعين عنه الإتصال بأي حد .... ومكتفينه تكتيفه سودا ...علشان عارفين إنه لما حيصحي حيحصل إيه ..... دول حتي ملبسينه كمامه ...علشان ما يطلعش صوت النفس ....!!!

يا ساتر ....يارب .... هي وصلت لحد كده .... بقي كل ده يطلع منهم ...

هوالغلطان وهو إللي سلمهم دقنه بطيبته وسذاجته وسلبيته ....

لأه ...وفيه الأمر من كده ....

إيه تاني ....

حاجات فظيعه ... أستغلو الغيبوبه إللي هوه فيها .... وعاملين يمصوا في دمه ويبيعوا أعضائه للي يدفع أكثر ...
أرجوك أكلمه ولو دقيقه أنت كده وغوشتني عليه خالص ....

يا سيدي لسه واخد جرعة بنج كوره وبنج رقص وبنج هلس وبنج بحث عن لقمة العيش ...حتلاقيه نايم وهو بيكلمك ...

مش مهم أنا حفوقه ...
خلاص أنت حر ...بس 3 دقائق بس ....

ماشي .....
ألو .... أيوه ياشعب .....

أنت مين .....

أنا واحد بيحبك وخايف عليك ....

أنت أخبارك إيه ....؟؟؟

كويس ....وجهزت الأعلام ورسمت العلم علي وشي ورايح أتابع الدوري في الإستاد

بقلك أخبارك ...مش ألعابك ....
أنا رايح المصيف أبلبط في الميه ...بعد أن أخذت أسبوع أجازه من طابور العيش بالعافيه ....

أنت مش فاهمني ... أحوالك ...ولادك .... مستقبلك ....

كله كويس وعملنا 100 أغنيه وطنيه علشان العيد الوطني للبتنجان المكبب ...

ياه ده أنت حالتك صعبه خالص ....
يا شعب ....أنت سامعني .....
أيوه سامعك ....

أنت عارف أن بلدك بتتباع بالمتر للي بيدفع أكتر .....وأن شبابك عاطل وبناتك عوانس ومصانعك قفلت وأرضك أتجرفت وخيرك أتنهب وفلوسك أتهربت ....
إيه الكلام الغم ده .... أنا ما ليش في السياسه ...!!!
طيب لو أنت مالكش في السياسه مين حيحافظ علي البلد دي ويشوف ويحاسب ويوقف إللي سرقينها ونهبينها وممرمغينك في الوحل والطين ....
فيه ناس بيعملوا مظاهرات ومدونات ومعارضه أنا قلبي معاهم ....!!
مش كفايه تعاطفك معاهم .... لازم الكل يتحرك ويشارك ...!!

صعب قوي إللي أنت بتطلبه مني ....

أنا مورس عليا كم خداع وتزوير وغش وفساد ...خلاني في الحاله إللي أنت شايفه دي .... ماتولع في دماغ صاحبها ....!!

ما أنت صاحبها ...أنت متخيل يا شعب أن الناس إللي بتحكمك دي ...عندها ذرة ضمير أوخوف عليك ..... إنسي ياشعب ....إنسي ياشعب ....!!

عموماً أنا حبيت أطمئن عليك وأقولك في شعوب حالتها كانت زفت وميئوس منها ولكن أتحركت وفاقت وغيرت والآن عايشه عيشة بني آدميين ...مش عيشه طين زي إللي أنت عايشها ...!!!

عموماً شكراً وأحب أن أطمئنك أن ممكن تظن أني مدهول وأنني مقضيها نكت ...ولكن لا تقلق ....وحقلك حكمه...سألو الحق كنت فين والظلم طايح ومبهدل فينا .... ؟؟؟ قال لهم كنت بحفر في الأرض علشان أجيب الظلم من جذوره .... إحنا كده

برضه ...صابرين ...ساكتين ... ولكن حيجي اليوم إللي حتنور الدنيا كلها علي صحوتنا ...وعلي ثورتنا ...وأسأل التاريخ ....وفيه ناس مخلصه مني بتعمل في صمت والتغيير قادم
أنت كده ريحتني شويه ...بس أتحرك بسرعه منظرك بقي وحش قوي ....
لا تستعجل ..... كله بأوانه ....

ماشي

سلاموا عليكوا

وعليك السلام ....

مقال للمهندس هيثم أبوخليل صاحب مدونة متر الوطن بكام

السبت، 14 مارس 2009

no comment



محاذاة إلى الوسط











no comment