موقف بلا مأوى

أخوكم النجم زى ما انتوا عارفين ايه

شغال فى مجال الكمبيوتر والانترنت والدى اس ال

أخوكم كان فى زيارة سريعة كده للشركات إلا شغاله فى مجالنا

نزلت الاسكندرية ورحت خلصت شغلى وبعدين ايه يابنى رايح على فين دلوقتى

قلت اروح دمنهور فيها وكيل لنا هناك

بعدين اخوكم مش وش بهدلة رحت على الابراهمية أركب سوبر جيت

فرايت مالم أراه من قبل العشرات من الطلاب

ماسكين بلطوا ابيض فى ايدهم وكتب جاين ياعينى من كلياتهم

ومروحين بعد معاناه طول اليوم من سكاشن ومحاضرات

ودكاتره مطلعه عينهم طول النهار وقفت معاهم استنى الاتوبيس

فاجأة أتى اتوبيس وببص مالقيتش نفسى كنت هنداس تحت الاقدام

لولى ستر ربنا الكل بيجرى على الاتوبيس أخوكم الصراحة

وبدون حلفان خاف مع انى بقولكم

إوعى تخاف

ولكن فى الشدة ممكن تخاف المهم أخوكم ركب

وايه زنقة وكأننا فى علبة سردين على رأى احد الركاب

وبعدين رحت دمنهور المدينة التى اعرف منها الكثير

من اصدقائى وبعض معارفى واقاربى

المهم خلصت شغلى وقلت اروح ازور احد اقاربى

وبعدين بعد معاناه نتكلم عنها فيما بعد

قلت اروح بقى الواحد اتهلك طول النهار

بقى اخوكم تعبان قلت تاكسى تحت الكوبرى العلوى

قالى اركب يابشمهندس اصلى كنت ماسك شنطة مهندس بقى

ورحت على الموقف فوجدت مالم تحمد عقباه فقد وجدت الموقف

"خاوية على عروشها" كما فى الصورة

فسألت واحد لو سمحت هو الموقف راح فين

قالى ايه ياعم انته مش عايش فى الدنيا ولا ايه

ده اتنقل بره البلد منهم لله

هم مين انا مش عارف ولو حد عارف يدعى عليهم فى سره

المهم قالى استنى الاتوبس فوجدت ناس كتييييييييييييير

وقفه مستنيه قلت اقف فأتى الاتوبيس

فوجدت الناس راحت جارية عليه فوجدت الاتوبيس

تحول الى ما نراه فى الصورة

مرة واحده قلت لنفسى طب كده انته هتتأخر

تعمل ايه قلت يلا اركب تاكسى هه

ورحت منادى تاكسى الموقف

فراح بصصلى حته بصه انا قلت انا شتمته

وراح قيلى ياراجل حرام عليك

وبعدين بعد طول انتظار وتليفونات من البيت والشركة

قلت مافيش فايده اركب تاكسى تانى

الموقف قالى هتدفع كام ياهندسة قلت له الا انته عاوزه

قالى خمسايه حلوه معاك قلت يلا امرى لله حكم الطر بقى

ورحت الموقف فوجدت ايه كل دى ناس

يانهار محمحى على بحلقى كمان

المهم سالت على موقفنا ورحت راكب

بعد بهدلة يصعب عليا حكايتها تانى

ومقدرتش اصور الصراحه خفت مركبش

والموبايل ممكن يتعلق منى فى الزحمة دى

المهم رحت راكب ولسان حالى يقول

لكم الله ياشعب دمنهور

وكفايه كده انا عارف انى دوشتكم
السلام عليكم ورحمة الله وبركاته

عام سعيد عليكم وعلينا

عــيـدنـــــا الحـقـيقــى يـــوم تـحـريــر الأقـصــــى

كل عام وأنتم الى الله اقرب

عيد سعيد عليكم وعلينا

ولا تنسوا إخوانكم فى فلسطين والعراق

وكل ارض بها جهاد بصالح دعائكم

مر عام على المهزلة فهيا نقول لا والف لا

لا والـــــ1000ـــــــف لا للمحاكمات العسكرية
نقولها بأعلى الاصوات
أفرجواعن علمائنا الاشراف
افرجوا عن رجال الاعمال المحترمين

من اجل اقتصاد مصرى مزدهر
لا نقول الا حسبنا الله ونعم الوكيل
فى كل ضـــالم جبــــار يمنع طفل من رؤية والده

ولا تــهنـــوا ولا تحــــــزنـــــوا وانــتـم الاعـــلــون إن كـنـتــم مــــؤمـنـيـــــن

عزراً على حذف البوست السابق

اخوانى الافاضل زوار مدونتى الصغنونة

(إوعى تخاف )

كما انا أسف على حذف البوست السابق الذى هو بعنوان

الخطوبة ...........حلم كل الشباب

معلش بقى حكم القوى والايعيش ياما يشوف والا تجى فى الشيش بقشيش وقدم الأحد علشان تلاقى السبت وكده يعنى وانا مكنتش احب انها تيجى كده فى اول تعارفنا ولكن لا تحزنوا البوست القادم بإذن الله يكون أفضل والسلام عليكم ورحمة الله وبركاته

الحمدلله المدونة تمت

السلام عليكم ورحمة الله وبركاته
اولا: انا لسه مدون ناشى وان شاء الله نتفاعل مع بعض
من خلال المدونة الصغنونة دى
ثانيا : هنتكلم باذن الله فى المدونة دى فى كل حاجه تخص
مصر من دين لانه اساس الحياة وسياسة وفن هادف
ورياضه اصلى اهلاوى صميم وفى كل حاجه تخص مصرنا
الحبيبة ومش هنخاف من حاجه ونتدخل فى كل حاجه تخصنا
ويلا ماهى خربت وان شاء الله تكون المدونه عند حسن
ظنكم بيها وان شاء الله هنتفاعل معها دائما وابدا
ثالثا : انا ادين بدين كبير الى اخى الكبير جمعاوى روش
طحن صاحب مدونة (فكك منى) لانه هو الا معلمنى التدوين
والصراحه بقالى يومين دوشه جدا من تليفونات وكلام لحد
ما المدونة تمت
فله اجر عند الله على ذلك ان شاء الله
وخلاص بقى علشان مدوشكوش من اولها ولنا لقاءات اخرى
من خلال مدونتكم إوعى تخاف

إلا عاوز يعرف عنى اكتر

اولاً: اود ان اعرفكم بنفسى انا فى سنة تانية كلية فى جامعة عريقة من الجامعات المصرية بحب بلدى اوى بحب الإخوان المسلمين

جداً جداً واحب العمل الدعوى والاسلامى اخذت من التدوين وسيلة لنشر فكرتى وهى فكرة الاسلام انا اصغر اخوتى عندى اخويا واختى والاثنين( خطبين) يعنى محدش يحط عينه عليهم المهم بحب اخويا محمد جدا لانه هو السبب فى انى بقيت إخوان مسلمين مش عاوز اقول خلى البيت كله إخوان مسلمين أختى الا بعده احبها وانفذلها مطالبها وامى الغالية ست الكل ربنا يخليها لنا ويديها الصحة يااااارب وطبعا احب ابى الا بيزعلنى لما يزعقلى لما اتفصل من الكلية او يجيلى مجالس تاديب واقوله ( قل لن يصيبنا الا ماكتب الله لنا) يقولى : يابنى احنا فى بلد ماسكها شوية حرامية

الكل هيسأل ايه اسم المدونة ده ؟ يعنى ايه

إوعى تخاف ؟
إوعى تخاف ده اسم جالى من المثل القائل (الا يخاف من العفريت يطلعله ) ولان الإيخاف فى بلدنا دى مش هيعيش بجد والله والخوف نابع من شعور داخل الانسان بانه يوجد لديه تقصير فى شئ ما فهذا هو الذى يسبب له الخوف او ايضاً الخوف من بطش الحكام والمتجبرين ولكن انا من خلال المدونة الصغنونة دى اقول لكل انسان ولكل مصرى لا تخاف ولاتحزن إنته فى بلدك الجميل التى ولدت فيها وتعيش فيها فلابد انك لا تخاف ايضاً فيها هذه هى فكرة اسم المدونة
طب المدونة هتتكلم فى ايه بقى ؟؟
اقولكم المدونة هتتكلم فى اى حاجه تخصنا فى بلدنا فى سياسة ودين ورياضة وكل حاجه تخص حياتنا -نحن المصريين- فلذلك انشأت المدونةوربنا يكرمنا بيكم وبكل زوار المدونة الصغنونة دىوخليك فاكر

إوعى تخاف!!!؟